الغربة الغشاشى ( وجع الغربة الدفين )

الشاعر عثمان نور الدين بابكر

رسلت لامى الجواب وريتا وهم الغربة ديــــــــــــك
وريتا اكتر منها وقلت ليها يمة بدور اجيــــــــــــك
قالت لى ياولدى الخزين كان جيتنا مرحب بمجيــــك
الفرحة بيك تملا البلد وعيونا تشبع وفى وشيـــــــك
لكن كمان انا عندى راىقبال تجينا اقولو ليــــــــك
ياريت قناعتك تقبلوا وياريت اشوف تاثيرو فيــــــك
الغربة ما وجعا" دفين لكن كمان خيراتنا ويــــــــن
ما خيرها برضو عليك كتير وعلينا يادخرى السنين
علت مقامك وفى الاهل وبقيت وجيه وبقيت رزيــــن
صلحت فى البيت القديم وكمان شرييت ليك قطعتين
وانشاء الله تبنيهم قريب وتلم عيالك يا حنيـــــــــــــن
فى كل عيد تكسى الاهل وتفرح الطفل الحزيـــــــــــــن
وتجينا شايل الشنط والفرحة تصبح فرحتيــــــن
وتوزع المال من طرف وتحلحل المديونيــــــن
ونسين كمان انك زمان حججت امك مرتيـــــــن
وابوك فى شان المرض كفنو حجة وعمرتيـــــن
غير حجك انت وعمرتك يمكن يكونن اربعيــــــن
وانشاء الله مولاى يقبلن يديك مقام الصالحيــــــن
فى كل جواب طلباتنا ليك اصلو العشم بعد الله فيـــــك
مرات نتقل فى الطلب ومرات نراعى ونستحيــــــــــك
رسلت شيكات القروش ما اظن فى زول ما جاهو شيك
ما انت شمعة بتحترق والعايلة قاعدة تضــــــــــوى بيـك
اصلو الرزق تسخير رجال ورزقنا صار تسخيرو بيــــك
اصبر علينا بجيك اجرو ورزقنا فوق رزقك بجيـــــــــك
وتجينا عاد فى كل عام تسعد قليبنا المشتهيــــــــــــــــك
لامن يلوح لينا الفرج والساعة ديك بنادى ليـــــــــــــك

هديك الليلة شوفو الغربة ماشه شوي
وأنا البتضار من عينيها
ما تشوفني وتـنـادى على
وأنا البـتـشـابا فوق للغـيـمة
كان الغـيـمة تـشفع لي
كان الغيمه تخطفني
وتحلق فوق ديارنا العامرة
تسرح بي
ولما الغربة تمشى تفوت
أجيكم تاني بين إيـديكم
اللولتنى لما كنت دابي جني

ولكن أنتو ما عارفين
وقسم الغربة كيف بـيـبـيـن
ولما الحاره تصبح جد
وما هو كـلاما شـيـتــا ً نيء
وكت اللحظة تبقى حـقـيـقـة
ويـن بـنـفــوت ؟
لا بابا ً بمسك الريح
ولا قـدرا ً بـيـعـرف الشب دابو ندي

فراقكم أنتو يا أهلي
دريـبـا ً قاسي كلو شوك
بطعن في القـلـيب الحي
وبـتـذكـــر وداعكم لي
وكـت عـتـبـت باب بيـتـنــا
ودمـوعكم تجرى تصرخ وي
بحس بجريها في ضلوعي
وبـتعـصر في كـبـيـدتي شديد
وما هو شوي
بحس بالخطوة تـبـقى تـقـيـلـة
أريت التانية تـرجـع بـي
وأقــول لـرويـحتي ويــن ماشـه
وتـسـيـبـي الـديـره بـالـفـيـهـا
من الجد العجوز واقف
و لي عـنـد البيحبي حبي
تقولي خلاص ده ياهــو قـدر
ومــيـن بـقدر بحـبـس الـسـيـــل
وكــت يـهــدر يــدوس الـشـتـلـة
ويـســرح تي
وسقت خطاي
وشلت حنانكم الغالي
وحفظتو معاي بـيـن أيدي
وكت أشـتـاق .. أفـــر أيـدي
ألاقيك يمه
الآقى الخالة
الآقى العمة بتقول لي
ودعـتـك الله ود بطني
قريب ترجع تانى
تضوي متـل الضي
دياركم أنتو يا أهلي
ديارا ً زين وبلد الطيبة
كست دروبا حارة .. حارة
و سكه .. سكه .. بي رجلي
بيعرفني الكبير العايش
وبيعرفني الصغير الشلتو فوق كرعي
بتعرفني الرمال الشاربة من موية بحرنا
البيها أتعطرت لما كنت دابي صبي
وحتى قصبنا بشهد بي
بى روائع نيلنا
ساقية الحنان راويه عزَّ الري
دي ما بلدي
وكيفن أنتو
إياكم أنتو ما بلدي
وإياكم أنتو ما أهلي
وإياكم أنتو غـنـوه قديمة في شفتي
بشيلكم آهة في الغربة
وبشيلكم نغمه في الفرحة
وحنانكم يا هو نور عيني

ورضيت بالغربة يا أهلي
رضيت بالغربة شان عزة حروفه غالية
فوق أحلامي تتواري وتقول لي
ياني راجياك تانى ترجع لي
ولو عارف السنين بتهون كفاي الفات
وكان أديتك الباقي
وبراك عارف الحنان العندي
متـل اللبنة صافى نقي
صفا السمحين
دعاء الطيبين
مشاتـل عامره
بى فرح الصغير اللعب من رمل الجروف
الجاريه شاقه ودي

هناك في الغربة يا أهلي
بشوف الناس غريبة وتايهه
في أحزانا طاويه الحي
بشوف في عيونا نظرات الودار
مليون سؤال في جوفي
تكويني وتخلف الكي
وحتى القمرة .. ما بتشبه قمر بلدي
البتضوي الساحة صافى لبي
ووين الخضرة ؟
وين الخضرة وين راحت ؟
وديك المويه فوق للصخرة
تصرخ تبكى وووووب وأحي

وحاتكم أنتو يا أهلي
ما في أحن من أهلي
منو الغيركم بـيـعرف البي
ويقاسمني الزمن لو جاني تـاري على
لكني خلاص
أتيمنت ... و أتيقنت
ما دام الغربة صبحت نغمه
بسمع صوتا فوق أضنى
وطعم الغربة في لساني
وأصابعو تدور تأشر لي
بسلم أمري للأيام
وأجيكم تانى
شان بى شوفتكم أتعطر
وأكحل بيها ضيء عيني

المسلمي يا زول إت بقيت شايقي على غفلة تقولي الغربي غشاشي
والله يا جماعة الغربة فعلاً وجعها دفين ونكتفي بما قاله الشاعر البارودي

أبيت في غربة لا النفس راضية بها...... ولا الملتقـى من شيعتي كثب
فلا رفيق تســر النفس طلعته ...... ولا صديق يرى ما بي فيكـتئب
ويقول أيضاً
كفى بمقامي في سرنديب غربة ..... نزعت بها عني ثياب العلائق
ِومن رام نيل العزّ فليصطبر على..... لقاء المنايا واقتحام المضايقِ

عدل سابقا من قبل tyara في 2009-05-24, 00:51 عدل 1 مرات

الاخ المسلمى
الغربه تبقى الهاجس الذي يورق كل انسان مبتعد من دياره واهله
وتبقى الاراده والتصميم والعزيمة الشي الوحيد الذي يصبرنا على هذا الهاجس المؤلم
وربنا يرد غربة كل مهاجر
واشكرك ووفقك الله يا الغالي على طرح المميز وفى انتظار باقى القصائدة وطبعا عبد الرحيم
البركل حاجز ليهو واحده هههههههههههههههههه
تقبل مروري

المسلمي والله كلامك سمح تب

انشاءالله الغيمة تخطفك وتحلق بيك فوق دياركم العامرة واكيد احنا معاك

المسلمـــي أخــــوي الغربــــــة مــــــــــاها غشاشـــي

الزول يجيـــــــــها نصيـــــــح وبي كرعيهو ماشــــــي

ما تفرح بيـــها تديك قــــــــروش وبيـــــــها تفـــــاشي

إن قبلت عليك تطقك كوع تخلي شوف عينيـــك طشاشي

هجام كتب:: المسلمـــي أخــــوي الغربــــــة مــــــــــاها غشاشـــي

الزول يجيـــــــــها نصيـــــــح وبي كرعيهو ماشــــــي

ما تفرح بيـــها تديك قــــــــروش وبيـــــــها تفـــــاشي

إن قبلت عليك تطقك كوع تخلي شوف عينيـــك طشاشي

هجــــام مانى البــفرح بيها الغربة ام قــدود

ولا بنعيـــم خيـــرة الفيهــــــو موجــــــــود

خير اهلى الوراى نحمدو ربنا ماليهو حـدود

هو اساسى اعيش فيهو لاحين ساعة الموت

والله يا هجام كلام صحيح الله يسترنا مع الغربة الواحد إن طلع ليه بحاجة بسيطة رطوبة مثلاً يحمد ربو.

وبعدين يا هجـــام والله أمرك بالحيل حيرنا

من ميســــك بدور تقطـع بالحديث خبرنا

أول شئ حبابك عشرة يانا سنـدك وياك فخرنا

يازول أقعد في الوطه نعرفك نخابـرك وتخابرنا

تحياتي ،،، أبو عبد الله

تيتا كتب:: المسلمي والله كلامك سمح تب

انشاءالله الغيمة تخطفك وتحلق بيك فوق دياركم العامرة واكيد احنا معاك

آآآآآآآآآآآآآآآآآآآآآآآآآآآآآمين يارب
Wink

tyara كتب:: طبعا عبد الرحيم البركل حاجز ليهو واحده هههههههههههههههههه
تقبل مروري

طيارة الحنين

فى رجاك وفى رجا عبد الرحيم البركل

abuabdullah كتب:: والله يا هجام كلام صحيح الله يسترنا مع الغربة الواحد إن طلع ليه بحاجة بسيطة رطوبة مثلاً يحمد ربو.
وبعدين يا هجـــام والله أمرك بالحيل حيرنا
من ميســــك بدور تقطـع بالحديث خبرنا
أول شئ حبابك عشرة يانا سنـدك وياك فخرنا
يازول أقعد في الوطه نعرفك نخابـرك وتخابرنا
تحياتي ،،، أبو عبد الله

تسلم عمو يديك العافية وفى انتظار المزيد

عاينت بشوف كلام المسلمــــي نجمو مغرب

ما أظنو فهم قصدي وللمعاني بعيداً ماهـو مقرب

خيالي وشيطان شعري يات من كان فعايلو بِطْرِّب

والما بعـــــرف بقولولو أسأل مجــرب

» اماسى الغربة
» على شاطئ الغربة
» خواطر من دفتر الغربة
» لماذا الغربة في زمن ضائع
» معاناة الغربة وماساة سودانيات