حلمنتيش

موضوع: رد: حلمنتيش 2009-05-08, 15:45

يامن حببته وما حصل حباني
قدمت طلبي إليكم من مدة
صهينتموا مثل وزارة الإسكان
حبحبتكم حبا يؤدي بأضلعي
سجلته بالفحم في الحيطان
أنسيت قعداتي مقاصد بيتكم
متفرجخا في عتبة الدكان
راجيكي تفتحي بابكم في مرة
حتي أشوفك حايمة بالفستان
أو تكشحي موية الغسيل بجردل
ويا جردلا شالته أحلي يدان
أو تندهي لأخوك من شارع الظلط
وأخوك كبسة معاكي في كل مكان
أنسيت جلساتك في حفلات العرس
تتجملين بأجمل التيبان ..
وأنا مصنقر ناصية في مقعد
ومقهي فيك مسهي فيك مشحط العينان
وينقرش الطبال في طرقاته
ويلولو الفنان بالألحان
ويقوم ملعون يلوك بوسطه
يدعوك للكاروشه في الميدان
وتقومي ترقصي في الجمايكا بخفة
وتوزعي البسمات بالمجان
والكل ماج وهججوا مثل الجزيرة
تموج بالفيـــــران ..
يا ليتني سما زعافا قاتلا
لقرضتهم قرضا بلا إحسان
حتي العريس وعروسه سممتهم
وغرغرت باقي السم للفنان
جبت الكراسي كلها وردمتها
وأطلقت فيها حارق النيــران
كوركت يا ناس المطافئ الحقوا
النار إمتدت إلي الصيـــــــوان
واذا أتوا ناس المطافئ قلت :
يا ناس المطافئ ثوانــــــــي .!
في القلب بارود وفي المصران ألغام
فلتطفوا نار الحب في مصراني
أو تأمروا هذي البنية تحبني
ما دام أبت ريدتنا بالإحســـــــــــان

موضوع: رد: حلمنتيش 2009-05-09, 03:50

انا من كوي طرطورة وبقي قيافة

انا من سك طائفة البرالمة احترافة
كل مامالت الي بلومة اوابصرتها من مسافة
لضربت كوراكاً وتمردقتُ انعراكاً علي زلط الصحافة
Laughing

انا البعشوم الساكن حسيب والرازي
وانا اكل الفول والعدس خلاني ديمه ارازي
حالف بالطلاق اليوم اشيل عكازي
واركبكم لقط واكسر كراع حجازي

موضوع: رد: حلمنتيش 2009-05-09, 04:19

مشكور كياري واصل الابداع
((دا البمبر قال مصدع من قعاد طول النهار
و فردتو المفراكة تبكي وتشكي من طول الدوار
و الملاح حارقاهو شطة صاري قال ما عاوز هزار
والرغيف فقران وناشف من صف النتظار
و جكسويتي قالت انا ما بغازلها ركبت وش حمار))
ابوشذي

موضوع: رد: حلمنتيش 2009-05-09, 08:46

تسلموا على الكلمات الجميلة وهاكم دى
مقطع من قصيد الشاعر الدكتور ود بادى يحث على تنظيم الاسرة وتحديدعدد الولادات
يحول الحول وحول بى زول
ان شاءالله حتى الزول يزاول
وياحكم صفر دا فاول
ياخلق ياعقل صبة
تلحسو االرز بالمربة
وتلدو كبة وراها كٍبة
وشان تقيف ما تاخدو حبة
حبة واحدة مع العشية
حبة فى جوف الولية
والمطايب هى هى
,,,
باليمين شايلنو سوسو واحد الله
وبالشمال شايلين تهانى مالو تانى
واب شنب شايل أمانى تلاتة بركة
وفى البطن بنجوسها فرفر
والقطر بى وراها صفًر والله يست

موضوع: رد: حلمنتيش 2009-05-14, 02:31

نمارق

كيارى

تيتا

صلاح

طيارة

يديكم العافية على هذة الاضافات التى انتزعت الضحكة من غياهب الكدر

سلمتم وسلم يراعكم

موضوع: رد: حلمنتيش 2009-05-14, 02:49

تعالوا نشوف البايركس بقول شنو

مع اعتذارى الشديد

Laughing

لي إيــدينا بنــــــــرفع ...والعازب كلو بيســــــــمع
نفوسنا كتير مشــتاقة ........للراعي دوام نتضـــــــــرع
شعارنا عريس متواضع .............ياخي ياقدر اسمع أجمع
نحن البايرات في لهفة ................والعمـــــــــر ولـــي وودع
نحن مساكين ياجماعة .......................وللجنة دوام نتطــــــــــلع
لو واحد قام وأتقــــــدم .............................في لحظة نلبي ونسمع
بلاش عربيــــة خصوصي ............................مالو الكداري دا هســـع
بلاش من شبكة وشيلة ......................................بي أبســط حاجة بنقنع
البيت ماشــــــرط عمارة ............................دي مظاهر ساكت تخدع
لي جنة نضيرة نحــــــول .....................البيـــت الخرب البجمـــع
ما شـــــرط تجيب تلاجة ..................كفاية الزيـــــــــــر البنقع
ما دايرين كبدة وشـية .................بي ويكة تقيلة بنشـــــــبع
ما أصلو شــبابنا الودع ........ما ممكن تانــــــي بيرجــــع
أحلامنا الكانت بــدري ....ما عادت تانـــــي بتنفــــــع
دايرين الشاب الأغبش ..حتى لو فقــــــران ومقطع
لانو الفيهو الفايدة ............ليهــو دوام نتطلع
حياة السـترة أملنا .....انشاء الله ربنا يجمـع
يحن الله عليـنا ...ونشـيل أيدينا ونرفـع

موضوع: رد: حلمنتيش 2009-05-14, 02:57

اخوانا الشباب لقوا فرصتهم ودايرين يتفشوا ويحتوا الكان عليهم

اها قالوا

للرب شـــــكوانا بنرفع ..........والبايـــر كله بيســـــــــــمع
في دربك يامـــا جرينا .............والعين الســــــاهرة بتدمع
كم مرة ايدينا اتمـدت ..........والرد الجــــــارح اقنــــــــــع
احلامكم والله غريبــة ...........وللعـــــــين بتزغلل وتذلــــع
طلباتكم لينا تحيــــــر ...........جايين تتواضعوا هســــــــــع
ما جينا زمان شن قلتو ............يافقير يامقطـــــــع أرجــــع
ما عندك حق الســــــــفة .............لابس دمـــــــور ومرقع
دايرين العنــــــــــدو مصانع ..........لو كان لي غيروا بيركع
ما جينا زمان شــــــن قلتو .............يافقير يا مقطـــع أرجع
في جيوبك ساكنة عناكب ...............لو كان باعوك ما بتنفع
دايرين العنـــــــدو الفـــــلة .............لو كان حنكوش ومدلع
ما جينا زمان شـــــن قلتو ..............يا فقير يا مقطـــع أرجع
لو ماشـــي لآخر الدنيا ..............تركــب رجليك تتبرطــــــع
دايرين العنــــــــدو البنز .............لو يبقى عجـــــــوزاً أصلع
ما جينا زمان شن قلتو ................يافقير يامقطع ارجـــــــــع
يا البيتـــك مبني زبالة ..............ومن غير فيضــــان يتزعزع
دايرين العنــــــدو الفيلا .............لو كان صغيـــــر بيرضــــع
ما جينا زمان شن قلتو .................يا فقير يامقطـــــع أرجــع
وموكيتاً فخـــماً فاخــــــــر ..............ونجفاً بالـــدر مرصــــع
والكندشة فريون ضــــاربة .............وثلاجة فريــــــزر تجمع
بي فيديو كاسـيت وأتاري ...................نتسلى لو وكتنا نضيع
ما جينا زمان شـــن قلتو ..................يافقير يامقطع أرجــــع
دايرين زنقيل ومقنــــــدل ..................لو كان تمســـــاحا يبلع
والعملة الحرة ضــــــروري ............والمهر دولارا يدفــــــــع
وبشرط الشــيلة العامـرة .................والكرسي الجابر يلمـــع
وذهباً مختوم وأســـــــاور ................مليانة الإيد للأصـــــــبع
وضروري الحفــــــلة بوردي ..............والكابلي اللحنو موقـع
ونقضي عسل في أوروبــا .................ونطوف العالم أجمــــع
بي لندن وروما وموســـكو ................وفينا المدن الأربــــــــع
نلبس في الكاسي العاري ..................ولو طلعت موضة بنتبع
وناكـــل فاكهة طـــــــازجة ...................وبالخير نتمتع ونشـبع
أفلامـــكم والله عجيبـــــــة ..................خلونا نحمض ونطبـــع
ماجينا زمان شـــــــن قلتو ....................يامبهدل أوعك تطمـع
مد رجليك قـــــدر لحافك ..............وشوف ليك طـورية وأزرع
لي مين تتقــــــــدم انت ...................يا قرد ياقبيح يا مبرقـــــع
كيفن بتحـــــب يا أغبش ....................من غير شاكوش تتفرقع
لو كان بنحــــــــب الزيك ...............ما أخير الموت الأســـــرع
لو مت وفاتك تفــــــــــرح ..................ولو عشت حياتك تفجـع
ولو تبقي ضراعي الأيمن ...................في لحظة بنقطع ونجدع
ما قلنا الدنيا دي فانية ....................وآمالنا مظاهـــــر تخــــدع
اختاروا العندو ديانـــــة ...................الديمة وشـــــــو بيلمـــــع
قلتولنا خلاص انتظـــرو .................الحــور في الجنة بتنفـــــع
الليلة قطـــــــركم صفر ................والعمـــــــــــــــر ولى ودع
عجزتو قعــــــدتو تقولوا .................واشبابنا الأغبـــــش أجدع
ماجينا زمان شن قلتو ...................يافقير يا مقطــــع أرجــــــع
ما جينا زمـــان ليه كنتو ....................جاهــلننا زي الشــــــــفع
ما خلاص الليلـة وقعت وا ..................من قد القفة الأوســـــــع
والليلة قطركــــــــم دور ...................وقعتوا في وش المدفــــع
رافعين الراية البيضـــــاء ..................لكن هيهــات ما بتنفــــــع
رافعين لعرس جماعي ....................وفي العشرة ألف ما بنطمع
وهنياً ليكم كبدة وشية ....................بعـــد الأضراس تتخلــــــــع

موضوع: رد: حلمنتيش 2009-05-14, 02:59

الموضوع شكلو بقى حايجر مشاكل Laughing

قاموا اتفقوا يعملوا نقابة للعزابة

قالوا

نقابة العزابه

دايرين نقابه نحن العزابه
نقوم نتخم بس نتلم
لانو لو الله ريحنا
الامه المتزوجه دى ما مريحانا

8888888888888

ناس كلابم وكدايسم
بى لحم الجداد شبعانه
انا بتمنى اغسل عدتم
والحس الصحانه
ما تضحك يا...
مالا ما صحانة ناس فلانه
عشان كده دايرين حى برانا
يوم جينا لقينا حفله
بجهزو كراسيها وصيوانا
وشمشمنا ليك تحت تحت
عرفنا فنانا
وجهزنا شعورنا
وقلنا خلاس الليله ضمنا عشانا
سيد الحفله عزم الحله
كلها ونحن فطانا
بالله دى ما عمله جبانا ؟
عشان كده دايرين حى برانا
كان فى المسح ولا فى العشوائى
ولا فى كوشة السلخانه
وبعداك نتحدى البتحدانا
وبالليل نجيب جركانه
ونغنى نانا يا نانا
ولا سيبك احسن نغنى برانا
والله يأزى الازانا

موضوع: رد: حلمنتيش 2009-05-17, 04:47

ممو ,,,,
القليب ما قادر المو
اصلو مجروح جاري دمو
ضربو زايد.. قاسى همو
قالو سبب الرجفة والموت
الحليو الأسمو ممو
واصلو ممو..
كمو كطو
وكطو كمو..
ابوها بابي
مامي امو..
من الجماعه الكل يوم
قاعد استحمو
والعطر خمسين متر
حرم تشمو
ولما تقدل بس تقول
تقلع ترابا التمشي فيهو
عديل تخمو
طبعو رقه
لونو منقه
في اوربا مارادونا
وفي بلدنا مافي زيو
الا تنقا
واصلى مما شفت ممو
قلت يا ناس دي الملائكه؟
ولا خلقه..؟
قالوا خلقه
قلت انو ..ما اظنو
واصلي من ما شفت ممو
عقلى فر وقلبي دقه
وبنطلون الجنيز طقه
اي عجور ضقتو بعدو
لقيتو منقه
باكو السجاير جوه جيبي
لقيتو حقه
الفنيله اللونا ابيض
فجأه جيت
ولقيتا زرقاء
يا ريتني لو من مويتو
القي ليا بقه
ان شاء الله حتي
لو فيها شرقه
يا ريتني لو في بحرو
القي ليا غرقه
كنت بغطس
وما بدور لي تاني مرقه
تاني امرق..؟
وين اقبل..؟ للبعاعيت؟
عليكم الله ديا خلقه؟
ممو يا ناس ما اذانا
بى خدودو البرتكانه
ممو يا عالم جمانه
لا اكل يوم زي عشانا
كسره بى لبن البطانه
ولا شرب من زير مغبر
زي فلانه وفرتكانه
ممو ما فيش منو اتنين
هما مخلوقين براهم
ونحن مخلوقين برانا
الفرق
نحن بنعوس كسره في الصاج
وهم رغيفن
بشتروه من اجزخانه
الفرق
هما بمشوا عديل افوتو
ونحن نترجي البكاسي
ويومي نتلفت ورانا
الفرق...
هم عندهم توليت مكندش
ونحن عندنا أأآنا
ممو حني عليكي بابا
تعالي نعمل حبكانه
امكن اتعلم
احب ناس هاي اروق
بدله فاخره واستكانه
غايتو حاقوليك حالي
كان نفع قولى اوكي
ما نفعت..
قولي ما نافع معانا
عندي شده
وبنطلون واحد مرقع
حالو حالنا ومستوانا
ابوي مزارع
احفر الطين بالطوارى
عرقو نازل
في هجير الدنيا
في الصيف والسخانه
شان القط لقمه .. لقمه
شان اتمتم لي ..عشانا
شان إشوفنا
بنقرأ نتعلم برانا
عمي ترزى ...وكان تمرجي
ولادو دسته
وكلهم ساكنين معانا
ممو يا الجو المكندش
شوفي كتاحه هوانا
واصلي عارف
بكره اظهر مغترب
نأكل النيم والزلط
وانتو بتلوكوا اللبانه
ونحن بنكابد نجابد
ونبقي في الأخر ضحيه
الشواكيش كع ..كرع
اتقول بس بندقيه
والمآسى الفي جوانا
كل يوم بتزيد شويه
الا بس اصبح عزانا
طيبه القلب البينزف
وكتين الناس البتشحد
وكل اطفال التشرد
لما امشوا عشان ارقدوا
ينوموا في نص الشوارع
يعني ما يلقوا المكانه
الا بس اصبح عزانا
طيبه اخلاصنا ووفانا
وكتين اولاد المدارس
يوت ادافروا .. في طريقهم
شان اكتبوا الحصه
في حينا وزمانا
الا بس اصبح عزانا
حب بلدنا
منبت الخير والوداعه
ريحه الطين والزراعه
حب تقاليدنا وطباعه
وفوقا ما بنرضي الأهانه

» حلمنتيش
» حلمنتيش العزابة
» حلمنتيش (الزمن الضايع)