بلادي انا

موضوع: بلادي انا 2009-03-30, 13:27

بلادي بلد ناساً مواريثم

في أول شي ..كتاب الله

وحصان مسروج، وسيف مسنون حداه درع

كتاتيبم تسرج الليل مع الحيران

وشيخا في الخلاوي ورع

وكم نخلات تهبهب في جروفا الساق

وبقرة حلوبة تتضرّع وليها ضرع

بلدي أنا

تشيل الناس ، كل الناس وساع بي حيلا وليلا يسع

وتتدفق مياه النيل على الوديان

بياض الفضة في وهج الهجير بيشع

بلدي سهول ، بلدي حقول بلدي الجنة للشافوها

ولي البرّة بيها سمع

بلادي أنا بلاد ناساً تكرم الضيف

وحتى الطير يجيها جعان ومن أطراف تقيها شبع

بلادي أنا بلاد الصفقة والطنبور وجاراتن تنق بالليل

وبنوتن تحاكي الخيل

يشابن زي جدي الريل

بلدي أمان ، بلدي حنان وناسا حُنان

يكفكفوا دمعة المفجوع

ويبدّوا الغير على زاتم

يقسموا اللقمة بيناتم

ويدّوا الزاد حتن كان مصيرم جوع

يحبّوا الجار

يموتوا عشان حقوق الجار

يضوقوا النار عشان فد دمعة

وكيف الحال لو شافوها سايلة دموع!

ديل أهلي .. واللــــــــــه ديل أهلي

البقيف في الدار في نص الدار

وأقول لي الدنيا. كل الدنيا ديل أهلي

عرب ممزوجة بي دم الزنوج الحارّة

ديل أهلي ..

ديل قبيلتي لمّن أدور أفصل للبدور فصلي

ديل فصلي

أقول بعضي

ألاقيهم تسرّبوا في مسارب الروح

بقوا كُلي

ألاقي قلبي والإحساس

وسافر في بحار شوقم زمــــان عقلي

أنا محل قبّلت ألقاهم معاي ، معاي زي ضليّ

أنا لو ما جيت من زي ديل كان وا أسافاي ، وا مأساتي وا زّلي

تصوّر كيف يكون الحال لو ما كنت سوداني...

وأهل الحارّة ما أهلي

موضوع: رد: بلادي انا 2009-04-02, 02:48

تسلم اخي مصطفى
بلادي انا وديل اهلي
كلمات رائعة وجميله الله مما احتوته من حنية اهلنا الطيبين في السودان
ومن لحنها الذي تميز بروح الجروف والطين والبحر
والسودان الجمال والطيبة واكيد عروبتهم تمتزج بدم الزنوج الحاره للخير
والعطاء واكيد دا السودان الجمال وروعة وكما قال الشاعر
بلدي أمان ، بلدي حنان وناسا حُنان
يكفكفوا دمعة المفجوع.و يكفى ذلك
ولك تحياتى