مشكور المهاجر ولو ما فيها احراج انت مهاجر يعني مو مغترب
والله موضوع مهم كتير و لكن يا مهاجر التعميم حرام واعتقد انو فكرة احتقار المغترب بقت الايام دي موضة اولا المغترب في كل الكرة الارضية له وزنه واحترمه ما عدا وطني السودان
لا ننكر ان هناك مشاكل بسبب غياب الاب او بسبب سوء الظروف المحيطة يعني تعسر حركة الحياة وصعوبة العيش خاصة في القرى والأرياف ولكن يا ابني المهاجر لو الناس ما طلعت برة كان كيف يكون الوضع وخلينا نشوف المليان من كباية الموية بلاش نشوف الفاضي بس
انت لما تتحدث عن عيوب المغترب ليه بتنسى التبعات الكتيرة والالتزامات البفرضوها عليهم القاعدين في البلد يعني اذا كان البيت فيه مغترب واحد بغض النظر عن ما هية عمله في الغربة تلقى كل العائلة خاتة الحمل عليه يعني العايز يتزوج لازم يدبر ليه الشنطة والعايزة مرته تلد لازم يجيبوه ليه الريحة كاملة وخاصة في زمن الريحة السودانية بقت اسعارا خرافية وكمان لسبة لبستنين للمولود والولده بقرا في المدرسة عايز اخوه وله خاله وله عمه وله ابن اخوه يرسل ليه رسوم المدرسة عشان الولد ما يمرق من المدرسة
مع كل هذا الضعط على المعترب عليه تصريف اموره الخاصة التي لا يجد من يساعده فيها خاصة اولاده بيقولو ابوهم بقدر يرسل ليه ليهم قروش نحنا مالنا
وما ننسى جية المغترب من الغربة دا براه موضوع يهجج واسال مجرب لا تسال طبيب كل ما جمعه المغترب خلال العام تلقى معظم الميزانية تروح عشان يكسي فلان ود فلانه و فلانة بت فلان وكمان بقت الهدايا لازم تكون من الشيء المعتبر يعني الناس بقت ما بتقبل هدايا اي كلام يعني توب البولستر والفستان القطني البسيط بقى ما بنفع
والسفنجة بقت ما هدية مع انو السفجة هي لباس الشعب في كل الاحوال حتى خارج الحمام
كل هذا في وطني السودان عشان كدا يا ايها المهاجر رفقا بالمغتربين هم معذين وعيالهم تعبانين من عدم تعاون الاهل معاهم تعرف ليه السبب ما هو ابوهم قال انو مغترب خليهم ياكلوا نارهم وبعدين تجي انت يا مهاجر تقعد تنبش فيهم وتطلع اولادهم بايظين ومطروضين من المدارس واهل الدكاكين ما بيرضوا على قولتك يطلقوا ليهم
والله المقتربين مظلومين من ناسهم واهلهم على وجه الخصوص بس الناس مستننين متين يقع صاحبنا عشان يضحكوا عليه ويسوهو مخسرة في مجالس الجبنة ويقولو والله زمنو دا كلو مغترب هسه جا عندو شنو
ام محمد
الرئيسية 
أحدث الصور 
التسجيل 
دخول 
2009-10-18, 09:43
