السودان_النيل الازق_الشروق!!!!

لدي سؤال ساطرحه عليكم بناء علي السيناريو الذي ساسرده الان ....ركزوا معي جيدا في السيناريو قبل الاجابة ... االسيناريو كالاتي:-
المذيع :-انت فلان ده دفعتك ياصاح ؟
الضيف يجيب :-لا هو الدفعه القدامنا كان
المذيع :-يعني هو اكبر منك صاح؟ثم يرسم المذيع ملامح ابتسامه كبيرة بلها صفراء علي شفاهه مصحوبة ببدايات انخراط بضحكة باهتة وسخيفة ماتلبث ان تنطلق بمجردان يفهم الضيف محاولة الاستظراف المصنوع ليجيب عليه ضاحكا ايوة انا اصغر منه مايحاول يعمل ليكم انو انا الكبير .

ثم بعد ذالك تعم الاستديو برمته ضحكات مسايرة واضحه تفقع مرارة كل من يشاهد هذا الاستظراف المصنوع
السؤال هو.... بربكم كم مرة شاهدتم هذا السيناريو يتكرر امام اعينكم بفضائياتنا السودانية الثلاث (السودان...النبل الازرق... الشروق)؟؟؟
شخصيا ساجيب عن نفسي لاقول بانني اشاهد هذا(العبط)و(الاستظراف) الزايد عن حده و(محاولة خفة الدم)بفضائياتنا السودانية يوميا وان كنت ادرك تماما انه مقرر ثابت ومفروض علينا (نعمل شنو )!
المشكلة كلها في المذيعين لو خلوا الرشاقة الشديدة والضحك الطوالي دة بكون احسن ومن صفات المذيع الجيد هي نسيت اقصد السئ طبعا اول حاجة عدم جدية التحضير كان ينسي اسم من يقوم محاورته عدم التمتع بالقبول لدي الناس وماننسه الرشاقة وخفة الدم الذايدة والسعي بخطف الكميراء من الضيوف باحراجهم ودي اهم حاجة والرتابة وعدم التجديد واخيرا من صفات المذيع السيئ ان يكون اسمه (..........................)؟؟؟!!!
ضعوا ما شاء لكم في المساحة اعلاه من اسماء مذيعيين فقط!!!
(الاسم داخل القوس علي مسؤلية كاتبه)
نقطة سطر جديد

السلام عليكم
ياسمر ذي ما ذكرتي انو في اصطناع في حركات المذيع وهي اصلا ما فيه بس في بعض المذيعين الكويسين مثل حمزة عوض الله وناجي حسن وغيرهم وكمان بنلاحظ انو الاسئلة روتينية ومعروفة لكل ضيف وان دل وانما يدل علي استهتارهم الزائد عن الحد وقلة كفائت بعضهم

والله المستعان

مشكورة اختي نمارق علي المرور
وصحيح في كثير من المذيعيين الكويسيين ذي ما ذكرتي وفي..... ومثال للمذيع السئ عندك في قناة النيل الازرق مساء كل خميس فقره افراح افراح التي يقدمها المذيع امجد نور الدين وامجد زاتو ممكن يتقدم ويتطور لو ترك طريقته الفجة في ادارة الحوار مع ضيفوا في (الاعراس)او(الاستديوهات) ولو ترك ابتسامته الكبيرة التي لا تتناسب وطبيعة ملامح وجهه وفاه واخيرا لو ترك طريقة الاستظراف الزائد عن حده والممجوج هذا يمكن لامجد ان يحصل علي الدعم والتوجيه ممن يسندوه
ليس امجد وحده من يحاول الاستظراف وتخفيف الدم كثيرون هم من يفعلون ذلك!!!

اشكرك سمر على طرحك لهذا الموضوع المهم الذي ازعجنا كثيرا واحرجنا

والله اول مرة احس انو في زول غيري شعر بالشعور دا

مرات كثيرة يخطر على بالي سؤال وهو هل الشعب السوداني لا يصلح لواجهة الاعلام هل المسالة مسالة عدم اكتراث بالنتائج ام قلة خبرة ام عدم ثقة في النفس لا ادري ماذا اقول

ولكن كل ما ارجوه ان يعاد النظر في هيكلية مؤسسات الاعلام السودانية وان تبنى ارضية جديدة مواكبة لعصر ليس فقط بالثياب المطرزة بالاحجار ولا بالحنة المرسومة ولا بالخاتم العملاق ولا بالالوان والاصباغ المبالغ فيها هذا بالنسبة للعنصر النسائي ام العنصر الرجالي حدث ولا حرج ولا اجد نفسي مستعدة لاذكر ايا من الاسماء في هذا الوقت ولكن لو فعلت فسيكون ذلك احتراما للرعيل الاول من الاعلاميين السودانيين المميزين الذي عملوا في وقت انعدمت فيه الامكانيات
وقلت فيه الخبرة ام الان كل شيئ في متناول اليد فما السبب في كل هذا الاخفاق

لكم احترامي
ام محمد

و الله اشكرك اختي سمر على الموضوع و بالمناسبة فعلا مذيعيين القنوات السودانية في منتهي البياخة و اللاموضوعية يعني مافي كويسيين في الجداد صراحة يعني ممكن الجيل الكويس بتاع عمر الجزلي و الجيل دة مثلا عندك مذيع عالم الرياضة و البدل الفضفاضة من باب المهلة سمحة تقول جلابية و الله هدوم تفضح الوان غريبة و كلو كوم و الساعة الكاسيو ام 10 ريال كوم يعني مزيع ما قادر اشتري ساعة كويسة و الله علل بس و هم المفروض انهم واجهة للسودان ما يشوفوا عمر الجزلي ما شاالله لبس و اسلوب و فهم يعني عمرهم ما حيكونوا زي الجيل بتاع الجزلي على الاقل الراجل بفهم و مقييم نفسه ياخي الراجل عارف نفسه مذيع ساعته على الاقل ب 12 الف دولار رولكس ماستر 2 جي ام تي, صراحة مذيعي القناة الفضائية الحاليين الجيل الحالي و الله انا بكرههم و بكره انهم واجهة للسودان لانهو فضائح

أبي

مشكوره ام محمد علي المرور

فمنذ ان دخل التليفزيون السودانى عصر الفضائيات والتطور الاعلامى ظلت المذيعة السودانية متمسكة بالصورة التقليدية الصارمة.. الابتسام ممنوع، والمزاح مستهجن، وتسريحة الشعرلها رقيب والملابس لها قواعد، الخروج منها يعني الغروب من الشاشة الصغيرةوالكثير من المذيعات كانو ضحايا تلك الرقابة غير المعلنة ورغم هذه القواعد التي لم تعد مقبولة حاليا.. فإن بعض مذيعات هذه المرحلة صنعن شهرة طاغية، وذلك بالثياب المزركشة والمكياج والحنة وطبعا ده اهم حاجة عندهم والراس فاضي ذي ماقلتي وبالرغم من ذلك تعلقت بهن القلوب المراهقة واصبح الهوس الفضائى بالمذيعات اللبنانيات والمصريات فى اغلب القنوات الفضائية ومع دخول السودانيات بقنواتة الفضائية ( هارمونى وزول والنيل الازرق والشروق والسودان ) اصبح التلفزيون

بلا هوية اونجومية واصبحت تلك القنوات اهم المحطات للنجومية والشهرة والخلطة السرية لصناعة المذيعة النجمة، تفتح الطريق أمامها للوصول إلى اعلى مراتب النجومية .

ولكي ودي

مشكور اخي ابي وذي ماقلتة مافي اي مقارنة بين المذيع الحالي ومذيع زمان
أسوء مذيعيين مذيعيين اليوميين ديل...
لا تستعجب أو تتعجب ...
نعم ،مذيع اليوم هو في غاية السوء ، والبرامج في غاية الإنحطاط ... مقدموالبرامج عباره عن مجموعة هواة لا أكثر .. أعتقد أنهم يدخلون إلى لجنة الاختيار ، فيجدون أعضاء اللجنة يفطرووون ..
أجد نفسي مكرهة و أنا استمع لنشرة الأخبار ، فالمذيعون كلهم لا يجيدون الأداء / ما بين مدعٍ و هاوٍ ، ( أي من الهواية لا السقوط في الهاوية رغم أنهم كذلك ..) ، تجدهم يتشدقون بأنواع الكلام ، وما فتئوا يدعون المعرفة ..
عموما .. ماذا ننتظر من تلفزيزن حكومي ، غير مهتم إلا بكل الأخبار التي يرون أنها تفيدهم ..
أسوء ما فعله أولائك .. و سامي الحاج ينقل إلى الخرطوم بطائرة عسكرية أمريكية ، وهم ينقلون برنامج البيت السعيد .. و الله إنه البيت التعيس .. لو كان البرنامج مباشر ، كان قلنا معليش ، ولكن يا للجهل ، البرنامج كان إعاده ...
ما عندهم فهم لمعنى السبق الصحفي ، كنت أفهم أن يقوم تلفزيون السودان بالاتفاق مع جهاز الأمن السوداني بمنع دخول أي كاميرا للمطار ، وينفردوا هم بالخبر ، ولكن ماذا تقول لمن يصر ألا يترقى إلأ لرتبة الحصان ...
.......................
كما قلت لكم ، أظنهم يفطرون وهم يجرون المعاينة ...
عضو اللجنة ... يا أخي كم مرة قلت ليهم ما يختو لينا توم مع الفول ده ... أيوا يا ابني إنت منو ؟؟
المتقدم للجنة .. إسمي احمد محمد عوض...
عضو آخر ... يا سلام لكنفول مدنكل دنكله ... أيوا يا ابني ..
عضو اللجنة .. يا أستاذ علان ، كده ناولني كيس الزيت ده بالله ... ، أيوا يا ابني عوض .. طيب غني لينا غنية ، زمن السلام للفنان أبو طبلة ...
المتقدم ... يا أستاذي أنا إسمي احمد أولا ،ثانيا أظن إنو ده لجنة المتقدمين لي مذيعي الأخبار و ليس كل الجمال ...
العضو .. يا ولد يا بشير .. جيب الموية الساقطة ... يسقط ركبك ... بي سرعة ... إنتو المرتبات حولوها ولا لسه ؟؟
عضو آخر ... مرتبات شنو ، إنتو ما قالو المرة دي هيتأخرو شويه ... أيوا يا إبني يا سعيد .. طيب هاك الجريده دي أقرا لينا منها ..( ويرفع صحن الفول .. ويقطع جز من الجريدة ، وكلها زيت وبقايا طعام ... )
احمد.. يا جماعة أنا اسمي احمد مش سعيد .. و يبدا احمد في القراءة ...
عضو .. كده العيشة ده ..
عضو آخر .. كده صحن الشطة ده أيوه أيوه، عضو .. يا أخينا معقولة البتقول فيهو ده ، نحن قاعدين ناكل يا أخي .. خلي عندك شوية إنفتاح عقلاني ... خلاص خلاص يا إبني عمر ، أحسنت تعال بكره استلم شغلك ...

موضوعك رائع ياسمورة00 وبصراحة لفتة بارعة00
لكن مع احترامي لي رايك00 بس طبعا ما كل المذيعيين السودانييين بالصورة السيئة دي00 طبعا فيهم الكفء وفيهم البصطنع المواقف وغيرو00
انا من وجهة نظري بشوف انو ياريت يكون النقد بناء لانو دي اذاعاتنا ودي بلدنا00 مش نفرح لمن نسمع بي زول بينتقد في تلفزيونا واذاعاتنا كانو نحن ماسودانيين00
وبعدين بصراحة المظهر مهم وحاجة جميلة انو يكون عندنا مذيعات بهذا الرقي والجمال00 بعدين منو القاليكم مذيعاتنا راسن فاضي؟ ولا المابتلحقو جدعوا؟؟
والناس مفروض ما تنسى انو الدول العربية التانية بقت تشاهد برامجنا وتعرف ثقافاتنا00 واكيد دا ما من فراغ0000
مفروض نفرح لي حاجات بلدنا الحلوة ونزعل للحاجات الماجميلة مش العكس0 0
وانا من رايي مامهم الحاجة الفلانية دي بيكم؟ لكن اهم من كدة التنسيق والرقي في الاستديوهات00
وقناة النيل الازرق مشهود ليها بجمال وابداع وتنسيق ديكوراتا
مع تحياتي ياسمورة العسولة
د0نجلاء

الله يعطيك الف عافيه يا سمر موضوعك راىع

مشكور عزيزي بلال

مشكورة علي المرور يانجول والله يديك العافية
نحن ما انتقدنا كل المذيعيين بس قلنا في فرق بين مذيع اليوم ومذيع امبارح ولا رايك شنو يادكتورة
قديما كنا نشتكي من لمسة الجمال في قنواتنا الفضائية " حينما كانت قناة واحده " كنا ندعو

ان تكون المذيعه او مقدمة البرامج لديها علي الاقل شيء من الجمال
والان كثرت القنوات و توفرالجمال ولكن جمال بلا روح وبلا ثقافة
وبلا أي مميزات ، اللهم الا الثياب الانيقة والاكسسورارات الجميله
والمكياج الصارخ ولكننا بالمقابل افتقدنا روح الحوار وحلاوة وتناسق
الكلمات ، وما يغيظ ان تكون في قمة استمتاعك بالضيف وبحواره وتريد
ان تستفيد من كل معلومه يقولها يقطع فجأة بمقاطعة المذيعه بكلمة ليست
ذات معني او فاصل من المفترض ان يكون بتنسيق بعد تكملة الضيف لحواره
او معلومته التي يستفيد منها المشاهد، واكثر شيء يحيرني ان يقطع ذلك الحوار
لاجل فاصل ونواصل ويكون الاذان ، هل الاذان فاصل ام انه شيء مهم يدعو ان
نقدمه بكل احترام لمعني الصلاة ونقف قليلا عنده .
يا حليل ايام زمان لما كان وقت الاذان يقرأ حديث قبله ويصمت التلفزيون الي ان تؤدي الصلاة.
ليت الزمان يعود ولكن تتبدل الوجوه والملامح ويبقي الجوهر كما كان .
ولكي ودي

طبعا الموضوع ما موضوع الحاجة بي كم بس بشكل عام مذييعن القناة السودانية عبارة عن مهزلة بكل المقاييس و غلطان البقول انو ديل برفعوا ساعات المشاهدة للقنوات السودانية او بوصلوا رسالة لانهم بالعكس بيجبوا للسودان المهزلة و السخرية من قبل الناس..
و غير كدة الاسلوب في التقديم و المحاورة اللبتضايق الطرف الاخر زي ما حصل امبارح في محاورة احد المذيعين لي الصحفي مصطفي بكري بداية بالغلط في الاسم ( الاخ مصطفي البكري),, و اسلوب انهاء الحوار و مصطفي بكري بتكلم لمن هو اتنرفز... تتخيلوا دة مذيع و الفاشليين غيرهم كتير سواء اناث او ذكور و دا ما بنفي انو في السودان في مواهب بس ما بتلاقي طريقة اشان ما تظهر..

اصرار ادارات هذه القنوات علي هذا العك والبؤس لسنوات طويلة وبعمر البث الفضائي لهذه القنوات يجعلنا نحاول ان نضغط عليهم برصد هذا العك المرئي والبؤس الاعلامي والذي اضر بشكل وصورة الانسان السوداني الذي يحاول ان يجعل لصورته موقعا في البومات العالم ...لقد شاب صورة الانسان السوداني كثير من ضرر بسبب هذا القنوات المشاهدة من كل العالم والتي لا تهتم حتي بشكل ومظهر مذيعيها وما تقدمه من برامج ومن صور بائسة . ففضائيات العالم تصور احسن مافي بلادها ترويجا لبلادها وتحفيزا لشعبها بان ينافس .. وفي بلادنا فان عشوائية الملبس والمظهر التي انتشرت في العقود الاخيرة لا يمكن ان توطدها هذه الفضائيات وجعلها امرا واقعا فمن يري ممثلا او ممثلة او مذيع او مذيعة في هندام ولبس انيق (الاناقة لا تعني الكلفة العالية ) سيحاول ان يحاكي ان تيسر له ذلك ..وبؤس الديكورات امر شائع رغم ان بلادنا تزخر باعلام من التشكليين واعداد منهم كثيرة ومهندسي ومهندسات ديكور لهم ولهن قدرات ابداعية تجعلهم ينافسون خارج بلادهم ولكن في الداخل مهمشون ...

بسم الله وبه الاستعانة

اولا : اختي سمر

كل واحد منا له افكار تختلف عن الاخرين
ليست من من استهزاء من مواضيع الاخرين لكن لو كان هذا الطرح ذات فائدة لشكرنا عليه
ولكن الموضوع ليست بهذا الحجم والجميع بهذا المنتدي اشاد بهذا الطرح ما الفائدة المرجوة ؟
نرجوا ان تكون مساهمات الجميع ذات فائدة تفيد اهل هذا المنتدي وجميع المسلمين.
لانو في زمن الفضائيات والصراع مع الشهوات وهذا سبب رئيسي كي ننشغل عن امور ديننا
معذرةً اختي الكريمة لا اريد ان اجرحك ولكن بل انصحك ان يكون طرحك ذات فائدة .
اذا نرجوا منك مواضيع جديدة ذات موضوعية وفائدة
اشتراكنا في هذا المنتدي ان نتواصل مع اهلنا مع الذين عرفناهم ولم نعرفهم بعد هم اهلنا .
سائلين الله ان يهدي الجميع الي يحب ويرضي .
اختي تقبلي مروري معذرتا اذا كان في كلامي جرح او مقاطعة لك
معتذ النور (ابو محمد)

الاخ معتز لك تحياتي
وذي ماقلتة اي واحد عندو افكارتختلف عن الاخرين وبعتبرة دي وجهت نظرك واي زول بي وجهت نظروا
مشكور