بت من ورق

موضوع: بت من ورق 2009-09-09, 05:56

بت من ورق

هوي يا الحبيب ..
أحسن عيونك فتحن...
ونفض غبار الجامعات الكتحن ...
عبرات هواي لو سدسدن حلقك تحن لي زول سواي ما تنحنحن ..
وأنا أصلي عارفك ما بتحن ..
ليه العيوينات البريدنك تخونن .. .. وتجرحن
ليه بالدموع والنوح مع الناس .. تفضحن ..
وأنا ديمة بسأل ربي إنو الطالبات .. يسمحن ..
الطالبات .. يسمحن .. ويفرحن ..
وبالخير تملي يصبحن ..
ولو في مشيهن لكلكة .. يصلحن ..
بس لو ظهر كاشف رقم لا يصافحن .. لا ينجحن ..
***
هو شنو الفضل في الدنيا عشان الناس تذاكر .. وتمتحن ..
بس نبرى من عيشة الفقر ..
وسمح السكات في خشم سيده .. وكمان سمح الصبر ..
مادام في مدرسة مدرسة .. وأساتذة خصيصين نجاح ..
وحصص صباح .. ودرس عصر ..
حنسوي ايه .. حندق جرس أخر فصل أو ننفصل نتلمى نشوف باقي العمر ..
ماواضحة زي عين الشمس ..
واضحة كان هسي وأمس ..
***
وأصلي مارق ياضنى .. من غنوتي الأنا مدمنة ..
من بلوتي وسلواي أنا ..
من قصة لا بتأكلنا عيش لا تفر جبين هذا العناء .. من شدة فاردة الإرتخا ..
ومتمكنة من ممكنة وما ممكنة .. وايه لزوم يعني القصيد وكتين تموت العاطفة ..
وكتين نعتم فكرتو ... وحروفو ذاته نلونها ..
وكتين نغدغد موجتو .. وندس عيونو وندفنها ..
ايه لزوم يعني الشعر.. الماعرف معناهو ولا شيتا عنا..
وأبقى مارق ياجنى ..
كان من هناك .. أو من هنا ..
كان منهم .. أو مننا ..
من مزامير التوجس والغناء ..من صباحات الهواجس .. ومن طوابير المدارس..
ومن مروق الروح.. وأمرق من متاهات النفس ..
ماواضحة زي عين الشمس ..
واضحة في كل الجرايد والمعـابد والمصانع .. والشوارع ..
لما دور نشعر نحس .. ولما دور خاطر يمر ..
واضحة إنو سكاتو مقدود من دبر .. وكلامو مقدود من دبر ..
وضميرو مقدود من دبر.. وقميصو مقدود من دبر ..
لكن منو البشهد عليك يابت مادام كلك عذر ..
يابت وكت عرفوك جد بتخافي من ضل الضحى .. ومن بشرة الناس السمر ..
ويؤسفنا جدا إننا .. ويؤسفنا أسود مننا ..
ومحنية ضهرو من الكبر ..
وعرفوك جد بتخافي من ضل الضحى .. ومن ضحكة الناس السمر ..
عرفوك .. بس هم ماأظن عرفو العيون السمحة فيك كانت شتر ..
ويسلم ضراع الطين .. وقدح المونة ..جيت أمونة ..
حر الواطة والدة صحونها .. للولد البشيل طوريتو سباك الفجر ..
***
واتضيع سنين العمر ليه في المدرسة .. المدرسة المابتجبر الخاطر إذن ..
المدرسة المابتستر الحال بكرة .. ومبتملانا فت شوال تمر ..
ياخ ايه لزوم يعني الدفاتر والمحابر والشنط والأردية والدق ودرس اليوم وحلق الراس وقليم الضفر..
ايييييييك يا سنين المدرسة .. فدتينا ايه يامدرسة ..
دي الجامعة لسه فيهاناس بتحب بعض .. وتلبس بعض .. وتاكل بعض ..
وتقوم بعض وتقعد بعض و........ منو العوض وليهو العوض ..
وفي ناس تجمع ورق فاضي وتمر .. تنجح فشل .. تسرق حصاد غيرها وتمر ..
وكتير في ناس بتفط سطر..
***
ياشعب أصحى كفاك شقى .. وكفاك خطاك على الجمر ..
لمتين حنحلم بالغناء .. لمتين نعدي من الضياع والحرقة والندم ونمر ..
وسمح السكات الفي خشم سيده .. وكمان سمح الصبر ..
والدنيا مازالت بخير ... والدنيا مازالت فقر..
وأنا زي دراويش العشق .. ماسقت خطوات الرحيل ..
لكن مشيتها وبالجبر ..لكن مشيتها وفوق جمر ..
وحبيبتي قالت لي تعال ..تعال
ومرقت من جلدي القديم .. ودرعت توب الصبينة .. ومشيتلها ..وانا منتشي
سنتين ولا قعدت عيوني مع عيونها اتونست ..لا في الخيال لا قيتها .. لالاقتني هي ..
سنتين ولا بنبدالنا سكة ولا خطانا بتنتهي ..
سنتين ورغم الإبتعاد والعشنا من خوف وارتعاد لسه ..
سعاد هي بتستحي...... وأنا بشتهي وأنا بستحي ....وهي بتشتهي ..
ومابين النعم واللقيا كان حرفي النهي ..
وانا خاطري من كتر الهموم الساعة خمسة نسى .. وسهي .. وفي الهم غرق .. وبالشوق حرق ..
وحبيبتي قالت تعال ..
خافت وكت قتليها شيخ .. مسكينة
مابتعرف الفرق بين الدراويش والشيوخ ...
بين الصفيقات والعرق.... بين الغرق والماغرق ..
تاريها زينا يا خلق طينة ومطينة بالعشق ... ومقتولة لحد السكات ..ومتيمة
بس كنت ديمة بعلمها إنو الحزن زاد الفرح .. والفرحة نفسها مؤلمة ..
والعافية أسمح منها ..لو حتى كانت بلسمها ..
والشمس في توب من حلال .. والقمرة أكبر مجرمة .. وكضابة ومابتحلب لبن ..
القمرة كضابة مابتحلب لبن ..
ومليانة زيف ومهضلمة وممسوخة .. ومهما اتبرجت مازي مصابيح السما ..
والقدرة ما بتنفات شبر .. والسترة ميها الكمكمة .. والناس سواسية كالمشط ..
والحرة دينها ملجمة .. والحلوة مي حلوة طعم .. والمرة ربنا قاسمها ..
والقسمة مابالأيد كمان ... الأيد هي زاتها مقسمة ..
أصبع كبير .. واصبع صغير ..واصبع وسط .. واصبع نضم .. واصبع بدخل خاتمها ..
وتفرق بداية الشوق كتير وكتين تصل للخاتمها ..
ما الريدة بتشوف بي تحت .. والحب موشح بالعمى ..
وما بفهم النور الإ زول عاش في دياجر مظملة ..
النجمة مابتعني الوضوح .. و العتمة ميها الهضلمة ..
الوشمة مانسمة جروح .. والبسمة عز البفهمها ..
والنسمة في العين لو تفوح تحرق حشى البتنسمها..
والوجعة باردة على الببوح .. وتسل رويحة البكتمها ..
والروح بتمرق مابتموت ..
الروح بتمرق مابتموت .. والجدة بتقيم مأتمها ..
ونحن انعكاسات للنجوم .. والواطة ضل راميها السماء..
وأنا ما رميت إذ رميت وأي عاشق مارمى .. ضحك المشيب برأسه فبكى ثم نادى سلما ..
وبكت بغاث الطير حين كبا حزينا .. حزينا مرغما ..
***
وريتها معنى القارعة وربك دمدم . حفظتها الناس والفلق والحمد والإخلاص وطه ولم يكن والعاديات وكأنما ..ماكان في شي ..
وبعد ده كلو بتنتشي .. ولا بتستحي ولا بتختشي ..
وقرمت كرعيها بالمشي .. وكلمتها قتليها أوع تدقشي ..
الطيبة مافي كل شي ..
وما تهبشي .. الجوة خليهو جوة فيك والمابخش ماتخششي ..
ودمع الظنون البيني بينك قشقشي .. والشوق على باب البريدك وشوشي ..
ونار النضال جنب الشمس ماتمشي بي راحتك عليها يا روحي هوي بتشمشي ..
وكان جاك خريف الوجعة سويلك بيوت في داخلي ابني وعشعشي .. أديني احساس إني شي ..
وقرمت كرعيها بالمشي .. وكلمتها ..
خلي بالك يا بينة .. العمارات البناطحن والمعاني القرمزية ...
أوع تسرق من ملامحك أو تغير فيك شوية ..
ماني شايل هم قرايتك إنت قراية .. وذكية ..
أبقي جد ياحلوة فاهمة وأبقي واعية وكوني حية ..
أصلو في الجامعة العريضة .. وفي بيوت الداخلية ..
في الحبايب .. وفي القرايب .. وفي البقاسموك الأسية ..
الإ برضو خلي بالك .. هي المصايب مي شوية ..
العقارب والكهارب و الدبايب والمصايب .. وألف سوسة وألف حية ..
وإنت سمحة ..إنت قمحة ولسه نية ...
ولو دقست أسأليني أنا الدقستا وأكلوني السمسمية ..
في زمنا وحات عيونك بدفنوك يازولة حية ..
أبقي واظبة على صلاتك .. قومي كل ما نادى حي ..
وخلي بالك في الشوارع .. والمسافات القصية ..
وفي مشاوير العصاري .. وإنت ساعة المغربية في الحدائق والكباري والملاهي الأجبينة ..
والوليدات الأخيرلك من تصاحبيهم بينة .. والبنيات البظلطن وشهن..
والبتعمل فيها شيخة أو تقول بتشوف لها طيا .. وفي القراية سجم رمادهم ..
أبقي مارقة وناغمي ليا ..
مرة تلقى الضمة شدة .. ومرة تلقى الشدة مدة ... وعادي تلقى الخمسة مية ..
واسمع ... اسمع ..
يا تسمع في البغنن ..
الله ليا .. كر عليا ... جيبو ليا .. وسـ...... عاد ده كلام ..
ونحن يا حليلنا الغلابة .. بلعبننا وكوعليا ..
ودايرة بيرقر .. ودايرة شية ..
ودايرة طرحة وتيكو ملحة .. ودايرة جستي وميج ومسحة ..
وخصلة تايها .. وشنطة بطة ..
وعمو أسرع انقبطت وزولي نطة .. ودي المحطة وهنا لقطة وهنا ...
هيي يا إنت هيي وتاني هيي وهييييين ... عندكم كلب ولا أجي بالدرب .. أطفر ولا بدفر المافي شنو ..
أبوك لا راضي لا راضي .. كيسك فاضي ولا نمشي القاضي ..أشخت شخيتو ...........
***
وفي النهاية القصة فكة .. دي الحضارة الدينها فكة .. ولاحقة حبوبة أمي مكة ..
وعاملة فيها رشيقة حية .. ومهما نصرخ هيا هيا ..
ومهما نصرخ هيا هيا ..
وفي البتنسى أبوها يقدح .. في ضنى أيامو الشقية ..
عشان هي تقرا .. وبكرة تنجح .. وتحيا مستورة ورضية ..
وفي الحليلهم أماتهم يبكن بوراهم ووب وحيا ... الإ هن سجم المحنة ..
حليل زمنكن يارضية .. لا فؤادكن مرة حن .. ولا طرن بالمرة جيا ..
الشفايف مي شفايف .. والشعر سوونو كية ..
وبدن الإسكيرتي شرطة.. وتاني فوق الركبة طية ..
وبمرقن .........

أحسن أسكت ....... أحسن أسكت ..

شدي حيلك يا بنية .........
شدي حيلك ........

شكرا