تنزيل حسنات

موضوع: تنزيل حسنات 2009-08-31, 06:05

تنزيل حسنات
بقلم :الفاتح جبرا
الجهل مشكلة . بل مشكلة خطيرة . فبعد أن انتشرت مؤخراً جرائم النصب والاحتيال بحجة مضاعفة الأموال ها هي تنتشر موضة مضاعفة الحسنات .فبينما كنت أهم بالخروج من المنزل متجهاً إلي العمل استوقفتني جارتي (أم محمود ) وبعد السلام أخبرتني أنها تريدني في مشكلة خاصة فدعوتها إلي الدخول للمنزل إلا أنها قالت أن القصة بسيطة وما عاوزة ليها قعده .
وتتخلص القصة في أنها تعاني من جلوس زوجها السيد/ أبو محمود علي جهاز الكمبيوتر لساعات طوال وأنها وبالواضح تخاف أن يكون قد تعرف علي إحدي الفتيات ويكون القصة فيها (شات ) و (ماسنجر) ولقاء وزواجا .
طمأنتها بأنني اعرف (أبو محمود ) معرفة جيدة وإنو (الراجل) ما ممكن يعمل كده فهو مثال للاستقامة والخلق القويم لكنها قالت لي : هو غير ناس الاستقامة والخلق القويم القاعدين (يدبلو) هسه منو ؟ بدين يا أستاذ الظاهر إنك ما بتعرف بنات الزمن ده ختيرات كيف ؟
ذهبت ام محمود في حال سبيلها بعد أن طمأنتها ووعدتها بأنني سوف استطلع الأمر لمعرفة قصة الساعات الطوال التي يجلسها (أبو محمود) علي جهاز الكمبيوتر .
في مساء ذات اليوم قررت زيارة ( أبو محمود ) لاستطلاع الأمر ، وقد فوجئت به وهو يجلس أمام جهاز الكمبيوتر فبادرته :
- شنو الحكاية ؟ قالوا ليا الأيام دي مصاقر الكمبيوتر اليوم كلو
- شنو يا أستاذ الأيام دي أنا شغال (حسنات ) ساااااكت !!!
- ودي لقيتا وين ؟ في الماسنجر ؟
- مسنجر شنو في الايميل ... الايميل ... (ثم وهو يضع الماوس جانباً ويستعدل في جلسته ) اصلو الحكاية يا أستاذ إنو قبل كم يوم استلمت ليا رسالة في الايميل فيها دعاء كاااااارب ، والزول المرسلا قال لو الزول رسلا لي 100 زول ربنا ح يفتح عليهو والخير ح ينساب بين إيديهو والزول الما برسلا أو يحذفا ح يكون موعود بالويلات والثبور وعظائم الأمور.
- أها وإنتا رسلتها لي 100 زول
- طبعاً يا استاذ إنت براك عارف الحالة ما بتستحمل عظائم الأمور وكده
- وهسه طيب بتعمل في شنو ؟
- شوف يا أستاذ دي رسالة تانية أنا شغال برسل فيها من أول أمبارح فيها حديث (نبوي ) الزول المرسلا بيقول إنو البقرأ الحديث ده ح ينجيهو من عذاب النار والزول البرسلا لي 200 ناس تانين ح يسجلو ليهو علي كل زول 1000 حسنة
- يعني هسه قعادك ده كلو تلقيط حسنات !!
- آآي لكن انا بس شاكي في الموضوع ؟
- لي !!
- ياخي أنا هسه لو الكلام دا صاح حسناتي تكون قدر حسنات الصحابة ؟
- يا ( ابو محمود) أنت قايل (الحسنات دي) بيوزعوها سااااكت كده ؟ يعني بي دوست ماوس واااحدة تخت ليك في (حسابك) كم ألف حسنة ؟ طيب الزول البكفل ليهو يتيم أو يتصدق ليهو علي مسكين ح يدهوهو كم حسنة ؟
- ولكن يا أستاذ الرسائل دي كووولها أدعية وأحاديث نبوية شريفة
- حتى لو فرضنا إنو الأحاديث دي (صحيحة ) الثواب بتاعا ما بيكون بالشكل المبالغ فيهو ده وأصلو الحكاية لو كده الزول يقعد ليهو شهر في الكمبيوتر ويخم حسنات الدنيا والعالمين ويخش الجنة (لوج)
- طيب الناس البترسل الرسائل دي منو ؟
- هو في غيرهم ؟
- تقصد يا أستاذ منو ؟
- ما أكيد اليهود والأمريكان !!
- وعشان شنو ؟
- عشان إنتو اليوم كلو تقعدوا في الكمبيوتر تزيدو في (الحسنات) وهم يقعدوا يزيدو في (الترسانات )
في هذه الأثناء دخلت (ام محمود) التي كانت تتصنت علي التربيزة وهي تحمل (صينية شاي) والتي ما أن وضعتها علي التربيزة حتي وضعت يديها علي خاصرتها وحدجت في (ابو محمود) بنظرة غاضبة وهي تقول :
كمان اسمها (حسنات) والله انا من زمان قلبي كان بياكلني
منقول

موضوع: رد على تنزيل حسنات 2009-09-04, 14:34

يعطيك العافية الاخ مصطفى عالمجهود الرائع
مشكور وعساك عالقوة
بارك الله فيك
بأنتظار جديد تميزك دائما .
يعطيك العافية يالغالي
تسلم ياخى وربي ما يحرمنا من جديدك
وتقبل مرورى